تراختور ائتکیسی!!!

قوقول ریدئرده سایین ا.طاها بگ بلاقینین (eyvaz.org) گونجل‌لنمه‌سین گؤردوم. تیکلادیم. صفحه گلندن سونرا بیر گؤز دولاندیردیم، صفحه‌نین حاشیه یازیسی اصلی یازیلاریندان چوخ اولدوغونو گؤردوم!!! اولده اونلاری گؤزدن گئچیرمگه باشلادیم. سورقو جواب اولدوقلارینی آنلادیم. سورولارین بیری چوخ ایلگینچ گلدی دئدیم یازیم بورا:

"سایین محمد یازیر:
سلام چوخ یاخجی بلاقینیز وار. آنا دیلیمی چتینلیک‌له اوخودوغوما رغمن، آما هر گون اونو چالیشیرام. تراختور یا تبریزلی‌لرجه "تیرختور" یانداشلاری ایستیقلال تاخیمینین قاباغیندا او گؤرکم‌له دورماقدان سونرا هر شئی‌ی آنلادیم. سیزین سیته‌نی دوستلارین بیری تانیتدیردی و دوستومجا ان دوز تورکجه‌یی بوردان اوخویا‌بیلرم. بو یوروم نه قدر دوغرودور؟ آما سیزین یازیلارینیز چوخ چتیندیر و هر نه قدر اوخورام یاخجی یولا دوشمورم. سیزجه نئنی‌یم؟"

"محمد گرامی می‌نویسد:
سلام وبلاگ بسيار خوبي داري. درسته که زبان مادری ام را به زحمت میخونم. اما تلاش میکنم هر روز تمرین کنم. از زمانی که طرفداران تیم تراکتور یا به قول تبریزی ها تیرختور در مقابل طرفداران تیم استقلال با آن شکوه قرار گرفتند فهمیدم چی بی چی هست. سایت شما را یکی از دوستان معرفی کرد به نظر او درست ترین ترکی را اینجا میتونم بخوانم. این نظر چه قدر صحیحه؟ اما نگارش شما خیلی مشکله و هرچه میخونم خوب راه نمیافتم به نظر شما چکار کنم؟"

سیزجه بونا نه دئمک اولار؟

باشلیقسیز

اوستون لیگ تعطیلدی، ایستیردیم گلن هفته حذفی اویونلاردان تراختور- بلدیه اویونونا گئدم؛ اویون هفته نین ایلک گونو، شنبه ایدی. آما یازیقلار اولسون کی گینه اویون گونون دگیشدیلر و سالدیلار او گونون سونراسی گونه (یکشنبه) و او اوزدن من داها اویونا باخماغا گئدنمیه‌جم. نه ایسه ...

خطیبلی رسول دا تراختوردان گئتدی، رسولو چوخ سئویرم، منجه چوخ هوشلو اویونجودور. آما یازیقلار اولسون کی کمالوند رسولو هئچ اویناتمادی هردن بیر 10-15 دقیقه سالدی ایچه‌ری کی اوندادا هئچ یاخجی پاس زات وئریلمه‌دی. ائله یاخجی اولدو گئتدی گؤی پولاتجی‌لارا اوردا قول‌لاری آرد آردا دیزنده قدرین بیلرلر!

گؤی پولاتجی‌لارا اینانجیم وار! آما ...

اؤلوم‌دن سیزان داملادیر حایات!

بیلگی‌سایارلارین بیرینین آرخاسیندا اوتورموشدوم و هئدفون قولاغیمدا موزیک دینله‌رکن بیلمیرم نم نمنمه‌نی تایپ ائدیردیم. اوخوماقلار روبابه‌دن‌ایدیلر. حسن ده منیم ساغ الیمده‌کی بیلگی‌سایاردا ایشلی‌ییردی.

ایشیندن ال گؤتوردو و چکیلدی منه طرف بیرآز دانیشاق و دینجه‌لسین دییه.

-    نه‌یه قولاق آسیرسان؟

-    اوخوماق‌دیرلار، روبابه‌دندیر.

هئدفونون بیر قولاغین وئردیم او دا دینله‌سین دییه.

-    آذربایجان‌دیر هن؟

-    هن. تورکییه ده واریم.

-    کیم‌دن؟

-    موراد که‌کیللی و ...

آچدیم مورادی دا دینله‌سین. ووردوم اؤز سئودیگیم پارچایا (سن‌ده بولاجاقلار). هم ریتمی گؤزل‌دیر، هم‌ده زامانی اوزون دگیل 2.58 ثانیه. هم‌ده سؤزلری راحات‌دیر و آنلام‌لی. چوخ اوخویانلارین‌کی کیمی تیکراری سؤز دگیل‌لر! شارقی‌لارین سوزلری‌نین آنلام‌لی اولماقلاری و یئنی بیر شئی دئمک‌لری منیم ایچین چوخ اؤنملی دیر. اوول‌ده ائله ائشیدن کیمی تئز دئدی: "پاپ‌دان اؤترو اؤله‌رم!".  اوخویوپ بیته‌ندن سونرا دئدیم:

-    دئدیک‌لرینی آنلادین‌می؟

-    هن، [ گوله گوله] "سو بیلیر، توپراق بیلیر، بونو بیلمز چوجوق‌لار"!

اوندان سونرا سوردو:

-    چوجوق‌لار نه‌یی بیلمز؟

-    [من او دیزه‌نی خاطیرلاییم دییه یئنیدن سؤیله‌دیم و دئدیم] "اؤلوم‌دن سیزان داملادیر حایات سو بیلیر، توپراق بیلیر بونو بیلمز چوجوق‌لار". "اؤلوم‌دن سیزان داملادیر حایات" چوجوقلار اونو بیلمز!

بیرآز فیکیرله‌شدی و دئدی:

-    "اؤلوم‌دن سیزان داملادیر حایات" یانی نمنه؟

-    [بیرآز زیققیلدی‌یاندان سونرا] یانی اؤلومو بیر شئی، بیر جیسم فرض ائدیپ و بو جیسمین سو کیمی بیر مایع‌سی اولدوغونو فرض ائلی‌ییر. سونرا ایسه یاواش یاواش او سویون اوندان آخماسین سانیر و او آخدیغی دامجی‌لار حایات اولور.

-    داها نه دئدی؟

-    [من بیرآز فیکیرله‌شدیم، دیزه‌لری چتین خاطرلادیغیمی آنلادیم] گل ووروم اووله بیر داها دینلییه‌ک.

-    یاخچی

ووردوم اوول‌ه و دیزه‌لری بیر بیر اوخودوقجا اوخوماغی دوردوروردوم و آنلاتیردیم، اوولده موراد دی‌ین سؤزو یاواش یاواش دی‌ییردیم، آنلایاندا گئچیردیم اوبیریسینه، آنلامییاندا ایسه بیرآزدا راحاتلاشدیریردیم آنلاسین دییه. شارقی بیتدی.

بیرآز قونوشاندان سونرا حسن چکیلدی اؤز بیلگی‌سایاری طرفه و ایستیردی ایشینه باشلاسین. گؤردوم فیکره دالیپ.

-    اوخوماغی سئودین؟

-    هن، گؤزل‌ایدی، او دیزه‌سین دوشونورم!

-    هانکی‌سین؟

-    او ها "اؤلوم‌دن سیزان داملادیر حایات". یانی نمنه؟ اوندا به اؤلمک نه‌جور اولور؟

هئچ ایندی‌یه‌جن بو قدر بو اوخوماغی قولاق آسمیشدیم آما بونو تام آچیق آنلاییم دییه دوشونمه‌میشدیم. اوراسی ائله منه ده به‌لیرسیز گلیردی! او دیزییه آچیقلادیقلاریمی یئنیدن سؤیله‌دیم! آما اؤلمک‌ین ناسیل اولدوغو یینه‌ده بیله‌مه‌دیک!

بیرآزدان سونرا حسن اؤزو دئدی:

-    اؤلومو بیر شئی و جیسم سانیر، اوندان آخان دامجی‌لارین حایات اولدوغونو دی‌ییر. او دامجی‌لار اوندان سیزیر سیزیر و داماندا حایات اولور، او زامان کی داها او داملالار بیتدی و بیر داها داممادی و او جیسم قورودو او قالان شئی، او قالان قورو جیسم اؤلوم اولور!

حسن‌ین بو سؤیله‌دیک‌لری منی ده شاشیردی! و او به‌لیرسیزلیگی آرادان قالدیردی و چوخ سئویندیردی.

-------------------------

*حسن زنگان بؤلگه‌سیندندیر.

**من دامجی دی‌ییردیم او ایسه دامچی! :)

اؤزگون - شئیطان

قیرخ جانیم اولسا
بیرینی وئرمم
سن دگمه‌زسن دگیشمه‌زسن
سنین صاحیب‌ین سئوسین

هانکیمیز حاقلی
دونیالار فرقلی
بو عالمده ایشیم اولماز
یارام قلبیمده ساخلی

بو گئجه قلبیمی ائوده بیراخدیم!
روحومو آرتیق شئیطانا ساتدیم!
سنی سئومک‌له بؤیوک خاطا یاپدیم!
                         الوداع دادلیم.
------------------------------
یئنی تورکجه اوخوماغا باشلامیش‌لارا:
دگمه‌زسن: سنین دگرین (ده‌یر: ارزش) یوخ.
یاپدیم: ائله‌دیم (یاپماق: ائتمک)

هله اؤزیل‌یمیز قالئی!!!

هله اؤزیل‌یمیز قالئی!
بو دؤره دونیا فوتبول اویون‌لاریندا من آرژانتین یانداشیي‌دیم – تورکیه اولمادیغیندا. اورا اولاندا ایسه ایکیسی‌نین‌ده – مئهدی ایسه برزیل یانداشیی‌دی، ووردو آرژانتین اویون‌وندان بیر گون اؤنجه برزیل اوین‌لاردان حذف اولدو! مئهدی دارالمیشدی! سونراسی گون ایسه آرژانتین‌ین آلمانیا ایله اویونو وارایدی. مئهدی برزیل‌جن یوخ، اوندان بیرآز آشاغی سویه‌ده آرژانتین‌ین یانداشیی‌دی دا! بیرلیکته اویون‌ا باخیردیق، ووردو شانسدان آرژانتین ده آلمانیا قاباغیندا اوینویانمادی! 2 قول یئمیشدی، بیز بتر دارالمیشدیق! توپ آرژانتین اویونچولارینین آیاغینا دوشنده مئهدی دییردی: "هه‌ه‌ه‌ه ساغول!، تئز اول دی‌ی‌ی!!!!". اوبیری طرفدن ایسه توپ "مسعود اؤزیل"ین آیاغینا دوشنده‌ مئهدی آرژانتین‌دن بتر اونو آلقیشلی‌ییردی دی‌ییردی "آی ماشالاه، ساغولاسان سنی- ساغول اوزیل (Ozil)، تورکدو هااااا"!!!!. تئلئویزیون راپورتجوسو "اؤزیل"ی نجور سؤیلویوردو مئهدی ده اؤیله دی‌ییردی! من نئچه سئری دئدیم: "اوزیل یوخ اؤزیل!". او ایسه بیر سئری دی‌ییردی سونرا دؤنوردو یینه یانلیش تلفوظ ائتمه‌یه! سانکی مئهدی ده فارسلار کیمی "Ö" و "Ü" تلفوظ ائتمه‌ یئته‌نه‌گی یوخ! سونرا باشلادی یانلیش تلفوظ ائتمه‌گینی توجیه ائتمه‌گه! "اوزیل (Ozil) اسم خاص‌دیر و فرق ائله‌مز نجور سؤیلویه‌سن"!!!!
اوندان سونرا مندن سوروشدو "اوزیل یانی نه؟". او زامان من اونو یاخجی دوشونمه‌میشدیم. ائله بیردن بیره دئدیم: "اؤزیل، بیر اؤز و بیر ده ایل دن دوزه‌لینیب. تورکییه‌ده بیز "ائل" دییه‌ن سؤزجوگه "ایل" دییه‌رلر". من ده سانیردیم "اؤزیل" ده اؤیله بیر کلمه‌دیر.
آما دون آلمانیا و ایسپانیا اویونوندا راپورتجو دئدی: "اؤزیل یانی شاد". بو سؤزو دئمک منی فیکره دالدیردی. چوخ فیکیرله‌شندن سونرا "شاد"ی اوندان چیخارامادیم!!! آما بو سونوجا واردیم:
"اؤز" آددیر، یانی "کندی"، "ذات"، "اصل" و بوجور آنلاملار ... . تورکجه ده "ایل- il" و "ایل - ıl" آددان آد یاپان اک‌دیرلر. مثلا: "قیز + ایل: قیزیل"، "یاش+ ایل: یاشیل". بیلدیگینیز کیمی "ایل"ی آرتیراندان سونرا سؤزجوگون اؤنجه‌کی آنلامی دگیشیلیر آما اؤنجه‌کی سؤزجوکدن ایلیشکیسین تام ایتیریب و قیرمیر. "اؤزیل"ده‌ده یینه اوجور "اؤز" یوخاریدا دئدیگیم کیمی بیر آددیر، "ایل" اکله‌یه‌ندن سونرا یینه آد دوزه‌لینیر آما یئنی تؤره‌ندیگی سؤزجوک اؤنجه‌کی سؤزجوگون آنلامی اوزره اولسادا تام آنلامین بیلمیرم. بیلن اوسا اؤیرتسین.
آرژانتین و آلمانیا اویونو بیتدی و بیز تئلئویزیون قاباغیندان داغیلدیق، یوخاری گله گله مئهدی اوجادان قیشقیریردی "هله اؤزیل‌یمیز قالئی [برزیل و آرژانتین حذف اولدوغونا رغمن]!".
تاسف‌لرله دون مسعود اؤزیل‌یمیزده بیتدی!!! و منده آیدین به‌گ‌ه تای بتر ناراحات اولدوم. بو دوره هئچ اویونجونو اؤزیل‌ه تای سئومه‌دیم.

گؤک‌خان تورکمن – بؤیوک اینسان

گؤک‌خان تورکمن – بؤیوک اینسان

آت، سووور آت سئودایی بیر یئره فیرلات
بیتدی ساییپ آجییی قالدیر اؤیله آت
سور، هرکسه سور آجیلار اونوتولور
آغلایینجا گؤزلرین‌دن سیلینمیر
عئشق دفه‌سینده باخ بولونور
بیراخیرام زامانی اؤیله بیرآز دا
سن اولمادان دا یینه گئچر ناسیلسا
خاطیرلا بونلاری ساقین اونوتما
دیییردین آما او زامان گولوردون
یانیمدایدین، جانیمدایدین
ایندی ناسیل گئچر بو عؤمور؟

سوسما سؤیله ناسیل یاشار بؤیله اینسان!
سوسما قونوش، ها دی آنلات بؤیوک اینسان!
سؤیله بیر عئشق‌می چاره اولاردی زامان‌می؟
بؤیله قالدیریپ آتاردیق یا سئودایی!

آت، سیلیپ آت عئشق‌لری بیر یئره فیرلات
بیتدی سای کی دردینی قالدیر اؤیله آت
سور، نه اولور سور سن مندن آیریلیرسان
نه اولور دوشوم‌ده بیر عؤمور دوردورسان
عئشق هر دفه‌سینده منده آرارسام
بیراخیرام کندیمی اؤیله بیرآز دا
سن اولمادان دا من یاشارام ناسیلسا
خاطیرلا بونلاری ساقین اونوتما
دیییردین آما او زامان گولوردون
یانیمدایدین، جانیمدایدین
شیمدی ناسیل گئچر بو عؤمور؟

سوسما سؤیله ناسیل یاشار بؤیله بونو اینسان
سوسما قونوش ها دی آنلات بؤیوک اینسان
سؤیله بیر عئشق‌می چاره اولاردی زامان‌می بؤیله
بؤیوک عئشق‌لر بؤیله‌می بیتردی؟

سوسما هانی عئشق اینسانی ذاتن بولاردی؟
سوسما هانی ایل‌لر عئشقه چاره اولاردی؟
سؤیله ایل‌لر‌می داها هیزلی بیر قورشون‌مو؟
بؤیله سن‌سیز هر گون بیرآز یوخ اولوشوم‌مو؟


------------------------
*بلکی بو اوخوماقلار منی یازدیرا! منیم قارشیمدا گونده ایکی یا اوچ پوست گؤنده‌رن دوستلاریمیزدا وار! (داش‌قاپی و آنایوردوم‌لا) اؤز آرامیزدا قالسین اونلارا گیجیگیم گلیر! :)

توت آغاجی و چوجوق‌لار

ائوده بیرآز چؤره‌ک قیرینتیسی (خیردا چؤره‌ک) وارایدی، آنام دئدی: "اونلاری آپار وئر یئرینه داش دوز آل". آز اؤنجه یاغیش داملالاری شاببان شاببان یاغیب وتئز کسمیش و بو گون‌لرین اوت یاغمالارین آلمیش. گئتدیم توکان‌ا ساری، توکان‌ین قاباغیندا بیر بؤیوک توت آغاجی وار یئتیشدیم توت آغاجی‌نین آلتینا، آشاغیسیندا یاغیش سولاری آسفالت‌ین چوخورلاریندا کیچیجیکجه گؤل دورموشدو. توکانچی، توکان‌ینین قاباغیندا، توت آغاجی‌نین کؤلگه‌سی آلتدا قاتلانان صندل‌ی اوستونده اتورموشدو. توت آغاجیندان توت‌لار ایلک بیله‌مه به‌لیرسیز گلن ندن ایله اله‌نیردی! ایکی اوغلان اوشاغی قاچیپ گلدیلر و یئره تؤکولن توت‌لاردان ییغیپ و ییییردیلر. سو دورموش یئرلردن‌ده گؤتوروب ییییردیلر، توکانچی بویروق ائتدی (امر ائتمه شکیلده دئدی): "اونلاردان یوخ!، سو ایچینده‌کیلردن یوخ، بو طرف‌دن یییین!". اوشاقلاردا سایمایاراق ائله اؤز ایشلریندئیدیلر، آما ائله یییه یییه چکیلیردیلر قوراقلیق طرفدن یئمه‌گه. توت‌لار ائله دورمادان اله‌نیردیلر! من سانیردیم آغاج باشیندا سئرچه زاد وار اونلار توتلارین تؤکولمه‌سینین سببی‌دیرلر. بیر آن باشیمی قووزادیم باخدیم توت آغاجینا، گؤردوم یوخ! سئرچه مئرچه یوخ. بیر کیشی چیخمیش آغاجین بیر دالیندا و توت ییغیر، و توتلارین یئره تؤکولمه¬سینه ده سبب اولور! اوشاقلار چکیلمیشدیلر قوراقلیق طرف‌ه، اؤیله‌سینه ایکی قات اگیلبیپ یییه‌رک بیریسی قاییدیپ اوبیریسینه دئدی: "بئداوا ییییریخ!"، اوبیریسی ایسه دئدی: "هه!!". من‌ده ائله فقط باخیردیم، و اوشاقلارین اؤیله دانیشماسیندان سئویندیم.

چؤره‌ک‌لری وئردیم 7 کیلو اولدو، یئرینه یاخجی بیلمه‌دیم! یئدی کیلو زات دا داش دوز آلدیم و گلدیم.

ی.س.:
تام اونوتموشدوم!، ...
1389.03.17

دومان - یانی‌باشیمدان

دومان - یانی‌باشیمدان

سئوه‌مه‌دیم بن بو گونو
سئوه‌مه‌دیم باشیندان
گؤره‌مه‌دیم گئچدیگینی
یانی‌باشیمدان
هر یانیمدان

گله‌مه‌دیم بن اویونا
گله‌مه‌دیم یاشیمدان
قووالادیم سئودیگیمی
یانی‌باشیمدان
هر یانیمدان

یاشامادیم بن بو گونو
یاشامادیم عینادیمدان
گؤره‌مه‌دیم گئچدیگینی
یانی‌باشیمدان
هر یانیمدان

اللرین اوزانماسین
اوزاق دورسون
دئدیم ساقین
توخونماسین
خیال ائتدیکلریم بانا یاخیشماسین
اینانجیم یوخ بن‌یم!

اوچ دورد آی اؤنجه بیرآز اوخوماق گتیرمیشدیم. قارماقاریشیقدیلار. بو پارچا* دا اونلارین ایچیندئیدی. اونلاری آچدیم اوخوسون، وین‌امپ*’ده راست‌گله’یی وورموشدوم. اوخویوردو من ده ایشیمی گؤروردوم. ائله بیردن بو اوخوماق راست گلدی! الیمی ایشدن گؤتورتدوردو! دیققت‌له دینله‌تدی! آدامی دلیرتیر! ایندی 3 – 4 گون اولار بو ایش اولوب، اوندان بویانا دییه بیلرم 500 سئری دینله‌میشم!!!
---------------------
پارچا: تراک
وین‌امپ: Winamp

ی.س.:
1. بو پوست‌و آیدین بگ‌ین اؤیره‌تدیگی گیزلی آرا’یلا یازمیشام. داش قاپی بگ گیزلی آرا’نین ایشله‌تمه‌سینین زور اولدوغونو سؤیله‌میش، آما آیدین بگ اؤیره‌تدیگی یول لاپ راحات‌دیر. من بؤیله یازیرام: ایلک ماکروسافت وورد’دا یازیرام، سونرا اونلاری نوت‌پد یازیلیم‌ینا کوپی ائدیرم، سونرا ایسه نوت‌پد’دن بلاق‌ا وورورام.
2. من TrayLayout یازیلیم‌ییلا یازیرام، چوووووخ راحات (شیفت + آرا).
3. آیدین بگ زحمت چه‌کیپ و TrayLayout یازیلیم‌ین سیته‌سینه قویوب آما من اوراداکی‌ندان قوللانامادیم! سانیرام آپلود سورون‌لو اولموش! یئرینه بوردان ایندیردیم.
یاشاسین آیدین بگ!

دیل آدالاری!

بوگون (1389.03.18) تبریز’ین ساعات 20 خبرلرینده (فارسجا خبرلر) دئدی:

"مدرسه‌ی روستای کریم خان که به زبان تاتی حرف می‌زنند افتتاح شد!"
"تات‌جا قونوشان کریم خان کندینین اوخولو آچیلدی! "

خبر بیرآز به‌لیرسیز و موبهم‌دیر! ایندی بیلینمیر کی نییه کریم خان کندینین تات اولوغونا ایشاره اولونوب؟! هم‌ده بیر اوخول آچیلیشی خبرینده!!! یانی اوخول دا تات‌جا‌دا اوخوناجاق‌می یوخسا تات‌جا دا اوخوناجاق‌می (بو "تات‌جا" و "دا" آراسینداکی یاپشیق‌لیغا دیققت وئرین) ؟! اؤیله‌یسه تورک‌لر آراسی تات‌لاری قورویاق، و سونرالارا میللت‌لر آراسی دیل آدالاری بهانه‌سی‌ تورک‌لری آذری‌یه محکوم ائتمه‌یه قالسین!!!

یئریمک - یورومک

بوگون سحر تئزدن یوخودان دوردوم، گئتدیم صوپحانیه تازا کوکه (اردبیللی لر سومو دییر) آلام، گئتدیم آلدیم. ایکی گون اولار یینه کوکه آلیرام، اینصافن چوخ یاخجی پیشیریر، اؤنجه لیکلرده بؤیله پیشیرمزدی آللاه گؤرستمه سین بی تورشامیش ایگسی گلردی هاااا!
قاییداندا آنامی گؤردوم گلیر منه ساری، بیر بیریمیزه یئتیشنده دئدیم: "یئریماغا چیخمیسان؟" دئدی:"هن، هم بیرآز یئرییم هم ده توکاندان بیر شئی آلاجام." اوندان سونرا سوولدوق، اوللرده "پیاده روی" دییردیک، سونرالار آبامدان "پیادا روی"نی ائشیتمیشدیم و چون"پیادا روی"،  "پیاده روی"دن داها تورکجه¬دی اونو ایشلتردیم. سونرالار دئدیم بونون دا قورولوشو تام فارسجا دی نه فرقی وار دییه سن "پیاده روی" یوخسا "پیادا روی"؟ ایکی گون ایدی دییردیم گرک اونون یئرینه باشقا کلیمه قوللاتاق آما تاپانمیردیم! یانی تاپماسی ائله ده چتین ایش دگیلدی ها، آما چون بیز اولده "پیاده روی" ائشیتمیشیک ایندی ایسته سک ده اؤزوموز کلیمه دوزلده¬ک چون "پیاده روی" ترکیبی کلیمه¬دیر بیز ده چالیشاجاغیق اونا تای ترکیبی کلیمه دوزلده¬ک! نییه؟ چون بئنیمیز شرطلشیب (شرطی اولوب) بو بئیین شرطلشمه¬نی اونجه¬لر بیر ریاضی مسئله سین ایسلات ائله میشدیلر اوردا گؤرموشدوم.
هله کی بونو ایشلتیرم، بیلمیرم نه قدر یاخجی کلیمه دیر! آما هله بیزیم ایشی آشیریر!

سن-ده بولاجاقلار

موراد که کیللی (مراد ککیللی)

سن ده بولاجاق لار
هر گؤز یاشی ایچینده / بیر دنیزی ساخلار
سولار داشار بیلیرم / آغلایینجا* بالیق لار

قونوشسام* قیزاجاقلار! / سوسسام آساجاق لار!
منی منده دگیل / سن ده بولاجاق لار*

اؤلوم دن سیزان / داملادیر حایات
سو بیلیر، توپراق بیلیر / بونو بیلمز چوجوق لار!


بودا موراد که کیللی نین "قلبیمده کی دارپ" آدلی یئنی چیخان آلبومونون بیر تراکینین سؤزلریدیر.
چوخدان ایدی یازمیردیم، دئدیم بی یازاییم!
------------------------------
یئنی تورکجه اوخوماغا باشلامیشلارا:
آغلایینجا: آغلاماغا باشلایان زامان
قونوشماق: دانیشماق
بولماق: تاپماق